Семейде жаңа «Білім-Инновация» лицейінің құрылысы басталды

Семей қаласының Қарағайлы шағын ауданында дарынды балаларға арналған жаңа облыстық мамандандырылған «Білім-Инновация» лицейінің құрылысы басталды. Нысанның іргетасын қалау рәсіміне Абай облысының әкімі Берік Уәли мен «Білім-Инновация» халықаралық қоғамдық қорының президенті Дархан Өте қатысты. Жобаның жалпы аумағы 4,7 гектар жерді құрайды.

Жоспар бойынша, үш қабатты жаңа ғимарат 400 оқушыға шақталған. Оқу орнында оқушылардың сапалы білім алуы үшін барлық жағдай қарастырылған. Атап айтқанда, заманауи оқу кабинеттері, жабдықталған зертханалар, робототехника және IT-сыныптар, сондай-ақ шығармашылықпен айналысуға арналған арнайы бөлмелер болады. Сонымен қатар, жоба аясында 300 орындық жатақхана, спорт залы, кітапхана, асхана және медициналық кабинет салу көзделген. Жобаның құны 6,8 млрд теңгеге бағаланып отыр.

Қазіргі лицейдің жағдайы және болашақ жоспарлар

Қазіргі таңда жұмыс істеп тұрған лицей 1994 жылдан бері білім беру қызметін атқарып келеді. Оның ғимаратының жобалық қуаты небәрі 140 оқушыға арналған болса, бүгінде мұнда 224 оқушы білім алып жатыр. Оқушылар санының артуына байланысты жаңа ғимарат салу қажеттілігі туындады.

Жаңа ғимарат пайдалануға беріліп, оқушылар көшкеннен кейін, қазіргі ғимаратты күрделі жөндеуден өткізу жоспарланып отыр. Жөндеу жұмыстары аяқталған соң, бұл ғимараттың негізінде қыздарға арналған мамандандырылған лицей ашу көзделіп отыр. Бұл өз кезегінде өңірдегі дарынды жастардың сапалы білімге қолжетімділігін арттыруға бағытталған маңызды қадам болмақ.